تازہ ترین

شہر سرینگر میں17مارکیٹ چیکنگ سکارڈ تشکیل

ڈپٹی کمشنر سرینگر کی افسران کو اشیائے ضروریہ کی قیمتوں پر نظر رکھنے کی ہدایت

تاریخ    6 نومبر 2021 (00 : 01 AM)   
(File Photo)

سرینگر//ڈپٹی کمشنر سری نگر محمد اعجاز اسد نے جمعہ کو یہاں ایک میٹنگ کی صدارت کی جس میں اشیائے ضروریہ کے نرخوں کے نفاذ کا جائزہ لینے کے علاوہ شہر کے بازاروں میں بازار کی چیکنگ کو تیز کیا گیا۔ ڈپٹی کمشنر نے متعلقہ افسران کو ہدایت کی کہ وہ ضلع میں اشیائے ضروریہ کی قیمتوں پر "سخت نظر" رکھیں اور ذخیرہ اندوزی کو روکنے کے لیے ضروری اشیاء ایکٹ کی دفعات کو نافذ کریں۔ڈی سی نے ایف سی ایس اینڈ سی اے کے افسران سے کہا کہ وہ اس بات کو یقینی بنائیں کہ تمام ضروری اشیاء  کے مناسب سٹاک کو برقرار رکھا جائے اور قیمتوں کے غیر معمولی اتار چڑھاؤ کو کم کرنے اور تمام بازاروں میں قیمتوں کو مستحکم رکھنے کے لیے ایک بفر بنایا جائے۔ انہوں نے افسران کو یہ بھی ہدایت کی کہ وہ اہم اخبارات میں اشیائے ضروریہ کے نرخ مستقل بنیادوں پر شائع کریں، اس کے علاوہ دکانداروں سے کہا گیا کہ وہ دکانوں میں تمام اشیائے ضروریہ کے ریٹ لسٹ آویزاں کریں۔اس موقع پر ڈپٹی کمشنر نے تحصیل کی سطح پر 17 انفورسمنٹ مارکیٹ چیکنگ سکارڈ تشکیل دیے تاکہ مارکیٹ چیکنگ کو مزید تیز کیا جا سکے اور تمام اشیاء کی پہلے سے مقررہ قیمتوں پر فروخت کو یقینی بنایا جا سکے اور ذخیرہ اندوزی اور منافع خوری سے بچنے کے لیے مارکیٹ میں تمام ضروری اشیاء کی دستیابی اور معیار کو یقینی بنایا جا سکے۔میٹنگ میںایڈیشنل ڈپٹی کمشنر خورشید احمد شاہ، ایڈیشنل ڈپٹی کمشنر ڈاکٹر سید حنیف بلخی، چیف پلاننگ آفیسر محمد یاسین لون، ایس ڈی ایم ایسٹ اویس مشتاق، جوائنٹ کنٹرولر لیگل میٹرولوجی، اسسٹنٹ ڈائریکٹر ایف سی ایس اینڈ سی اے، اسسٹنٹ کمشنر فوڈ سیفٹی، متعلقہ تحصیلدار اور دیگر متعلقہ افسران بھی موجود تھے۔