کرنا ہ بنیادی سہولیات سے محروم:راجہ منظور

نستہ ژھن گلی پر ٹنل کی تعمیر کا مطالبہ

تاریخ    18 ستمبر 2020 (00 : 02 AM)   


سرینگر//اپنی پارٹی لیڈر اور سابق ممبر اسمبلی راجہ منظور نے اسمبلی حلقہ کرناہ کیلئے جامع ترقیاتی منصوبہ کی ضرورت پرزور دیا ہے تاکہ مقامی لوگ مزید محرومیت کا شکار نہ ہوں۔کرناہ میں پارٹی ورکروں کی ایک میٹنگ سے خطاب کرتے ہوئے انہوں نے کہاکہ مقامی لوگوں کو جواہم مشکل درپیش ہے وہ سڑکوں کی کمی ہے۔انہوں نے کہا’’کرناہ میں آئے روز سڑک حادثات ہوتے رہتے ہیں اور نستہ ژھن گلی کا بند رہنا لوگوں کے لئے بڑا مسئلہ ہے۔انہوں نے کہا کہ حکومت ِ ہند کو ٹنل کی تعمیر کا دیرینہ مطالبہ پورا کرلینا چاہئے جس سے یہ سڑک سال بھر لوگوں کی آمدورفت کے قابل ہوگی۔ انہوں نے حکومت پرزور دیا کہ کرنا ہ میں بنیادی سہولیات جیسے صحت، تعلیم، آبپاشی، مواصلاتی رابطہ اور بجلی کے معاملات کو حل کیاجائے۔ راجہ منظور نے کہاکہ علاقہ کے لوگ بنیادی سہولیات کی عدم دستیابی سے سخت پریشان ہیں ۔انہوں نے کہا کہ آج کے دور میں بھی کیرن اور جمگنڈ کے لوگوں کوہائی اسپیڈ انٹرنیٹ تو دور لینڈ لائن ٹیلی فون بھی دستیاب نہیں ہیں ۔انہوں نے کہاکہ اگر حکومت صحیح معنوں میں علاقے کو کچھ فائدہ دینے میں سنجیدہ ہے تو ا ِس کوپہاڑی زبان بولنے والے طبقہ کو دی گئی ریزرویشن میں آمدنی سلیب کو ختم کیاجائے ۔ منظور نے کرناہ حلقہ میں صحت مراکز میں ضروری مشینری کی فراہمی پر بھی زور دیاتاکہ ہنگامی صورتحال سے نپٹا جاسکے۔ انہوں نے کہاکہ اِس حلقہ کے لوگ ناگفتہ بہ حالت میں جی رہے ہیں، اسپتالوں میں ڈاکٹروں کی شدید قلت کے ساتھ ساتھ بنیادی ڈھانچہ بھی دستیاب نہیں۔ انہوں نے کہاکہ سید الطاف بخاری کی قیادت میں اپنی پارٹی عوام دوست ایجنڈے کی عمل آوری کے لئے کوشاں ہے اور ریاستی درجے کی بحالی ودیگر مطالبات جن میں جموں وکشمیر کے لوگوں کے لئے جامع اقامتی حقوق شامل ہیں، کی حصولی کے لئے جدوجہد جاری رہے گی۔
 

تازہ ترین