تازہ ترین

حفیظ نے کورونا کا ٹیسٹ منفی آنے کا دعویٰ کردیا

تاریخ    25 جون 2020 (00 : 03 AM)   


کراچی/پاکستان کرکٹ بورڈ کی جانب سے کورونا کے مثبت ٹیسٹ کے اعلان کے ایک دن بعد ہی پاکستانیٹیم کے سابق کپتان محمد حفیظ نے دعویٰ کیا ہے کہ ان کا اور ان کے اہلخانہ کا ٹیسٹ منفی آ گیا ہے۔خیال رہے کہ گزشتہ روز پاکستان کرکٹ بورڈ نے اعلان کیا تھا کہ دورہ انگلینڈ کے لیے نامزد کھلاڑیوں میں سے 7 کا ٹیسٹ مثبت آگیا ہے جن میں فخر زمان، عمران خان، کاشف بھٹی، محمد حفیظ، محمد حسنین، محمد رضوان اور وہاب ریاض شامل ہیں۔اس کے بعد دورہ انگلینڈ کے لیے منتخب اسکواڈ میں سے مجموعی طور پر 10 کھلاڑیوں کے ٹیسٹ مثبت آگئے تھے جنہیں قرنطینہ میں رہنے کی ہدایت کی گئی تھی۔تاہم آج پاکستانی ٹیم کے سابق کپتان اور مایہ ناز آل راؤنڈر محمد حفیظ نے کہا ہے کہ ان کا اور ان کے اہلخانہ کا کورونا ٹیسٹ منفی آگیا ہے۔انہوں نے سماجی رابطوں کی ویب سائٹ ٹوئٹر پر بتایا کہ انہوں نے دوسری رائے اور اطمینان کے لیے ذاتی حیثیت میں ٹیسٹ کرائے جس میں ان کا اور ان کے تمام اہلخانہ کا کورونا ٹیسٹ منفی آ گیا ہے، خدا ہم سب کو اپنے حفظ و امان میں رکھے۔حفیظ کی جانب سے کی گئی اس ٹوئٹ پر ابھی تک پاکستان کرکٹ بورڈ کا کوئی ردعمل سامنے نہیں آیا۔واضح رہے کہ پاکستان کرکٹ ٹیم کو 28جون کو دورہ انگلینڈ کے لیے روانہ ہونا ہے اور اسی سلسلے میں دورے کے لیے منتخب تمام 29 کھلاڑیوں اور ٹیم منیجمنٹ کے ٹیسٹ لینے کا فیصلہ کیا گیا تھا۔ابتدائی طور پر کیے گئے ٹیسٹ میں حیدر علی، شاداب خان اور حارث رؤف کے ٹیسٹ مثبت آئے تھے۔تاہم گزشتہ روز پاکستان کرکٹ بورڈ نے مزید 7 کھلاڑیوں کے کورونا کے ٹیسٹ مثبت آنے کا اعلان کیا تھا جس سے ٹیم کا دورہ انگلینڈ کھٹائی میں پڑتا نظر آ رہا ہے۔پاکستانی ٹیم کو دورہ انگلینڈ میں 3 ٹیسٹ اور تین ٹی20 میچوں کی سیریز کھیلنی ہے۔

تازہ ترین