تازہ ترین

جموں کشمیر بینک بانہال سربمہر

بینک ملازمین کی رپورٹ مثبت آنے کا شاخسانہ

تاریخ    13 جون 2020 (00 : 03 AM)   


محمد تسکین
بانہال //رام بن میں کووڈ۔19 کے مزید 21افراد کے نمونے مثبت آئے ہیں جس کے ساتھ ہی ضلع میں مریضوں کی کل تعداد193 تک پہنچ گئی ہے۔ان میں سے 37 مریض صحت یاب ہوچکے ہیں جبکہ 156 کا مختلف ہسپتالوں میں علاج چل رہاہے ۔ جمعہ کے روز پچھلے 24 گھنٹوں سے ضلع میں مثبت آئے اکیس افراد میں سے ایک مثبت شخص جموں و کشمیر بنک بانہال میں درجہ چہارم کا ملازم بتایا جاتا ہے اور اس سے نہ صرف بانہال میں خوف وہراس کا ماحول پیدا ہوا ہے بلکہ انتظامیہ نے جموں و کشمیر بنک برانچ بانہال کو سربمہر کیا اور ملازمین کو گھریلو قرنطینہ میں بھیج دیا گیا ۔اس مثبت آئے بنک اہلکار کی اہلیہ حاملہ ہے اور اسی سلسلے میں یہ ٹیسٹ 08 جون کو کئے گئے تھے اور نتیجے میں بنک ملازم مثبت آیا جبکہ اسکی حاملہ اہلیہ اور اس کے والدین کے نمونے منفی آئے ہیں۔